坐上由東向西嘅西伯利亞鐵路看東西（下）
第二日都係喺火車上面過，晏晝停咗喺幾個大站，可以落月台四圍行
｜上文提要｜ 坐上由東向西嘅西伯利亞鐵路看東西（中）
伊爾庫茨克 IRKUTSK → 葉卡捷琳堡 YEKATERINBURG（~50小時）
第二日都係喺火車上面度過，晏晝停咗幾個大站。因為我哋糧倉存量豐富，之前喺超市買咗個成個頭噤大嘅芝士包、寫到明話自己係正宗香港製造嘅「合 Taste」杯麵、生果仲有唔同類形嘅罐頭等等。所以喺月台冇買嘢，淨係落去四圍行。
火車靠站可以落車行吓買吓嘢飯嘢食
成條烤魚同皮草都有得你買
我哋夜晚約咗 Jessica, Natalie 同 Christian 去餐卡，今晚叫咗例牌嘅俄羅斯羅宋湯、 pancake 仲有啤酒。Jessica 嘅同房係一個俄羅斯媽媽帶著小朋友，雖然佢識多國語言，不過就係唔包俄羅斯文，所以都係言語不通。同房嘅俄羅斯媽媽好搞笑，每次火車一停站就會衝落火車站買雪糕俾佢食。到後期佢知道火車就快埋站就會早啲行開，避開「善意的雪榚」，而家佢講起食雪糕都驚。不過俄羅斯媽媽嘅舉動值得欣賞，總算係友善嘅表現，只不過遇上唔鍾意食太多雪糕嘅 Jessica 。
正宗香港製造「合 Taste」杯麵
之前喺超級市場買嘅芝士包同罐頭
俄羅斯羅宋湯
俄羅斯 pancake
俄羅斯啤酒
我哋喺火車上面呢兩晚咁啱係歐洲國家盃半決賽，德國對法國隊，正常每個歐洲人或者鍾意足球嘅人都會為之瘋狂。德國嚟嘅 Natalie 同 Christian 當然唔例外，碰上呢場世紀大戰，但佢哋竟然冇得睇甚至唔知道賽果，好似同外界失去聯絡一樣。
佢話邊隊贏都冇所謂，因為佢哋總會有一個人開心。佢哋一個支持德國，另一個支持法國。佢仲話其實咁樣仲好，而家佢哋喺度放假旅行，就應該全心享受而家嘅經歷。喺火車上面冇咗網絡，先可以完完全全俾佢哋離開本身城市嘅生活同習慣，我非常欣賞佢哋嘅態度。
佢哋對世界各地唔同嘅文化都好感興趣，所以佢哋開始咗一步一步去環遊世界嘅計劃，希望去過嘅每一個地方都會好好記住。因為呢個係佢哋兩個嘅人生計劃，要長時間保持呢一份熱情真係唔易。所以佢哋有個好得意嘅習慣，就係每個星期都會去一間食唔同國家嘢食嘅地方，一方面保持嗰份熱情仲有對唔同地方嘅好奇感。透過呢果簡單但實際嘅每週活動，佢哋可以略略從飲食或者餐廳嘅室內佈置認識一個陌生嘅地方，好鍾意呢兩位德國人嘅浪漫。
第二日朝早六點我哋就到咗葉卡捷琳堡落咗火車，之後我哋喺莫斯科參觀克里姆林宮嘅時候撞返好啱傾嘅 Natalie 同 Christian ，雖然係新認識但係感覺好親切。
葉卡捷琳堡 YEKATERINBURG → 莫斯科 Moscow （~28小時）
之前訂火車飛以為會喺葉卡捷琳堡留一晚，點知計錯時差，最後我哋只能短短逗留一朝 ，喺同日嘅下晝一點鐘上返火車，坐大約 28 個鐘火車去莫斯科 Moscow 。今次我哋坐返二等車廂四人房，喺同一間房瞓上下格床，有咁嘅組合見到邊個都唔怕。
上次聽到 Jessica 話佢嘅同房係俄羅斯媽媽帶著小朋友嘅經歷其實幾得意，唔係因為佢會請你食雪糕，而係真正可以感受本土人係點樣坐火車，所以都有少少期待我哋都會遇到點樣嘅同房。
今次我哋預早咗好多時間，又係我哋先入車廂。熟手技工嘅我哋即刻反起下格床，放咗兩個大背囊落床下底。放好自己啲嘢又係四圍行，熟習吓四周環境嘅時候。點知一行出走廊，我就見到一個著住熱褲小背心嘅俄羅斯美女。佢知道我望住佢，就屈起佢嘅左手對住我笑。中午嘅陽光啱啱好由窗外打喺佢塊面同身上，加上佢笑咪咪噤用非常甜美嘅笑容望住我，整個畫面都好溫暖好靚。時間好似停頓咗喺呢一瞬間，真係比佢搞到我有少少暈火車浪。好在嗰時我仲有少少意識，即刻攞返部手機，捕足咗呢位令我融化嘅超美俄羅斯娃娃。講多無謂，睇圖最實際。
令我融化嘅超美俄羅斯娃娃
我企喺走廊雙手攞住電話叉電，雙眼就望住沿途嘅風景兩個鐘
今次我哋喺葉卡捷琳堡落車，只係去咗觀光，冇時間去補給糧倉，所以食物唔多，晚飯唯有去餐卡食兒童餐。呢架餐卡同之前嘅好唔同，最特別就係冇乜特別，俾人一種膠得嚟有些老土，同埋冷冰冰嘅感覺。特別嘅就係嘢食嘅份量都係咁細價錢都係咁貴。
我哋嗌咗雞湯，牛肉炒雜菇同埋例牌嘅羅宋湯。 因為唔知道同房嘅作息時間，驚會阻住佢哋休息，我哋食飽坐咗一陣，天都未黑就返房準備瞓覺。返到去原來佢哋玩緊啤牌，我估佢都驚會阻住我哋休息，所以冇幾耐佢哋都準備上床瞓覺。係一個好尊重別人同好有教嘅俄羅斯家庭。
雞湯同例牌嘅羅宋湯
牛肉炒雜菇
冇幾耐就有一個俄羅斯男人行咗入我哋嘅車廂，不過佢睇嚟好攰。我哋禮貌打咗聲招呼，佢就好似不醒人事咁瞓咗喺下格床，上格床就一直都冇人。
呢程火車行經嘅山頭都係長滿紫藍色嘅薰衣草，不過火車行得太快，影唔到靚相，只可以用雙眼好好欣賞。因為我部電話冇電，如果要叉電就要行出走廊。不過我哋嗰架車卡嘅電制位都比人用曬，好在俾我喺隔離卡搵到。咁我就企喺走廊，雙手攞住電話叉電，雙眼就望住沿途嘅風景。
睇睇下原來成兩個鐘，電話終於叉好電，於是我就行返入房。瞓下格床嘅男人執曬嘢仲落埋車。火車啱啱埋站，我哋諗可能會有新嘅同房上車，令我哋可以再一次期待。聽到有好多人上車落車嘅聲音，終於有人停咗喺我哋嘅房門外面，係一家三口嘅俄羅斯媽媽帶住一對我估應該仲係讀緊小學嘅兄妹。我哋打咗聲招呼，但發覺佢哋唔識講英文，只係禮貌地笑一笑回應。媽媽同仔仔好靜，好似怕會嘈住我哋唔多出聲，囡囡就好痴媽咪，每分鐘都會叫媽媽。因為咁我哋學咗俄羅斯文點樣叫媽媽，發音好簡單，係 ”媽 (第一聲) 嫲”。
呢架餐卡最大嘅特色就係毫無特色
第二朝起身我哋又想用咖啡外交，不過媽媽好客氣搖頭禮貎拒絕，仲準備咗即沖野飲嘢食俾仔仔囡囡做早餐。媽媽嘅外表有點冰冷，可能係一種對住陌生人同要保護子女而築起嘅冰牆。媽媽幫囡囡紮頭髮，之後就食早餐。之後媽媽同仔仔玩啤牌，囡囡就攞本簿仔木顏色畫畫。我就喺火車上面買咗個即沖薯蓉頂肚，希望一陣有機會經過大站落車買嘢食。我啱啱沖好杯薯蓉，火車就停咗落嚟，我哋成間房嘅人都落咗火車。
呢個月台好正，有好多流動小店，佢哋推住車仔又或者捧住些嘢食賣：有士多啤梨、紅莓、有餡麵包、肉丸、青瓜、雞蛋、番茄、香腸，連成條醃好嘅魚同唔知真定假嘅皮草都有得你買。
我哋買咗好多嘢食，買到最後一刻先上火車。喺呢個月台買嘅嘢食真係好平好抵好好食。原來媽媽都買咗杯紅莓，我哋買到成枱都係野食，仲邀請佢哋一齊食，不過媽媽都係請返我哋食檸檬。
第二朝起身我哋又想用咖啡外交
同車廂嘅俄羅斯小兄妹
排隊買本土地道美食
呢個月台買嘅嘢食真係又平又抵又有風味
士多啤梨、紅莓、有餡麵包、肉丸、青瓜、香腸乜乜乜
當我哋仲諗緊點樣可以破冰，突然諗起不如睇吓囡囡畫緊乜。我好快食飽之後就爬上上格床，諗到不如就快快畫啲嘢送俾佢。因為唔知佢哋幾時會落車，又唔知佢鍾意啲乜，咁我就一於見佢畫緊乜就畫啲乜俾佢。
幾年冇畫過畫嘅我真係生疏咗好多，其實畫得唔多滿意。我畫完之後寫咗我同 Simmy 個名、日期同埋我哋喺香港嚟，就遞俾佢媽媽，話想送俾佢囡囡。我哋唔肯定佢識唔識聽，但佢第一時間就露出笑容，遞俾佢囡囡。囡囡一見到都好開心，呆咗笑住噤望住媽媽，仔仔見到媽媽同妹妹咁開心佢都開始笑起上嚟。
最後我哋互相合照影相留念，就喺噤我哋成功打破俄羅斯媽媽冰冷嘅外表，而我呢幅畫都係我印象中見過嘅人最開心收到，威力最大嘅，見到咁樣我哋都好開心。冇幾耐佢哋真係要落車，俄羅斯媽媽仲第一次唔係請我哋食檸檬，佢請咗仔仔囡囡嘅俄羅斯糖俾我哋食，我哋都即刻攞咗些糖同朱古力同佢哋交換。而我哋仲要繼續坐到首都莫斯科先落車，今次成功打破語言嘅障礙，真切體驗與本土俄羅斯家庭共處，對我嚟講係一個好難忘嘅經歷。
囡囡攤本簿仔同木顏色出嚟畫畫
呢幅畫係我印像中見過嘅人最開心收到嘅
成功破冰，最後我哋互相影相留
莫斯科 MOSCOW → 莫聖彼得堡 St. Petersburg （~8小時）
今次落咗火車我哋會喺莫斯科留三日，喺第三晚去火車站坐傳說中好高檔嘅紅箭號 Red Arrow 高級特快通宵火車去尾站聖彼得堡 St. Petersburg。呢程車嘅車程好短，夜晚十一點上車，第二朝八點鐘就落車，所以主要都係瞓覺為主。
但係坐咗咁耐平民版二等車廂，都想試吓坐最高檔次嘅火車。因為一等車廂兩人房嘅價錢實在太貴，我哋揀咗高檔版二等車廂四人房，而今次我哋兩個都係瞓下格床。
呢程火車包咗宵夜同埋朝早會有熱辣辣早餐送到你車箱，喺開車冇耐就會同你落單，唔使怕會餓親。紅箭號除咗外表紅噹噹夠曬吸引，一入到火車地下就舖曬紅色嘅地氈，一直入到房都係。顏色全部都係紅白為主，窗簾枱布都襯得好靚，俾人一種簡單懷舊但係又有貴氣嘅感覺。今次自己嘅床位都有獨立嘅地方叉電，唔使再罰企企喺走廊。
車廂有一種簡單懷舊但係又有貴氣嘅感覺
一入到火車地下就舖晒紅色嘅地氈
好期待呢一程嘅同房係點樣，我諗應該都係正正常常。 不過最後真係冇乜特別，我哋嘅同房係兩個男人，一個一上車就除衫上床瞓覺，第二朝起身攞走早餐就好趕時間咁落車。另一個就喺美國教書，略略傾過幾句計但係冇乜印象。 可能係班車嘅目的地同行車時間，坐嘅人都商務、工作性質為主，隔離卡就有少量嘅亞洲遊客。呢程火車冇乜特別經歷，最特別係瞓咗一個好覺同試過坐高檔次嘅火車。就係咁我哋就初次坐西伯利亞鐵路由蒙古國坐去俄羅斯嘅聖彼得堡。
今次我哋兩個都係瞓下格床
今次我哋兩個都係瞓下格床
第二朝八點鐘就落車
如果俾我再揀多次，我都係會揀坐西伯利亞鐵路呢個方法。不過鐵道旅行好睇自己嘅性格，無論人哋講得有幾好都可能未必適合你。如果你對每一件事物都好奇心，願意打開多一點自己同人哋溝通，了解多啲人嘅文化同習性；喺旅途中唔介意遇到嘅每一件事，無論好壞都成為你珍貴歷程嘅一部分；鍾意睇風景影相又唔怕成日都冇得上網同沖涼，我會鼓勵你坐上呢條西伯利亞鐵路。
我有興趣冰天雪地嘅時候再坐西伯利亞鐵路，因為我覺得西伯利亞應該要配上嚴寒嘅環境。一片冰天雪地係我細細個認識呢個名嘅畫面，正所謂 「西伯利亞人，冬天的冠軍」，如果之後有機會，記住要冬天去見識一吓西伯利亞人係點樣過冬天。好彩嘅話你可能見到佢哋著住泳裝四圍走，又或者赤膊飛撲喺雪地上。
不過短期內我都冇呢個打算，但係我相信總會有咁嘅一日，好好感受一吓西伯利亞嘅嚴寒。