坐上由東向西嘅西伯利亞鐵路看東西（上）
我哋就係坐呢一班西伯利亞鐵路嘅跨國火車由蒙古國烏蘭巴托去俄羅斯嘅伊爾庫茨克
要坐上呢條西伯利亞鐵路之前當然就梗係要買飛先啦，但其實一啲都唔易。首先你要安排好日子，計劃你想逗留嘅城市，睇下火車班次嘅時間同你本身想去嘅日子同時間啱唔啱，因為有啲車站唔係日日有火車經過。
你會途經幾個唔同嘅時區，一陣時將會係通宵行駛，由東向西走會走入較慢嘅時區，時間有可能會俾你追返轉頭，喺網站或者車票顯示嘅時間係當地城市嘅時間，真係增添咗唔少難度。
不過原來我哋而家喺網上面買車飛已經容易咗好多，因為之前買車飛嘅官網都淨係得俄文，要搵外語大師 google translate 幫手先得。而家就進化到有英文嘅網頁可以買車飛，不過千祈唔好中計，記住英文官網淨係用嚟睇就好啦，如果要買飛都係用返俄文官網買，因為用俄文買車飛會平30%。可能俄羅斯想推廣俄文，如果你識俄文即係自己友所以俾個自己友優惠你買車飛。精明嘅我哋就梗係睇完英文個網頁再用俄文網頁買飛，最後「成功爭取」優惠買車飛。我哋由上網搵資料到真係買得成車飛用咗一個月時間，所以我哋喺蒙古國攞到張“車飛喺手嘅時候真係有啲激動。
唔係有錢就買到嘅車飛
烏蘭巴托 ULAANBAATAR → 伊爾庫茨克 IRKUTSK（~24小時）
我哋第一程嘅西伯利亞鐵路喺蒙古國嘅烏蘭巴托站上車去俄羅斯嘅伊爾庫茨克 Irkutsk，係一班通宵嘅過境火車，車程大約要 24 個鐘。火車站大堂好靚，樓底好高，有水晶吊燈， 雲石柱同地板，柱頂有浮雕，加上木嘅門框窗框配合起嚟都幾有氣派。行到入口候車區就迫滿咗人，個個都係大大件行李，總算搵到幾個 backpacker 做同黨，好奇咁諗會唔會同佢哋同一個車廂。其實牆身掛滿咗蒙古國嘅風景畫，重裝埋兩排射燈，不過就冇乜人留意佢哋。
喺我哋過嚟火車站嘅時候落咗一場大雨，好在背囊都有 rain cover 擋一擋，真係有髒擋髒，有雨擋雨嘅必備神器。 我哋首先要搵啱車卡，然後攞住護照同車飛等上車。好順利我哋就成功登上火車，除咗嗰幾級上火車嘅樓梯比較高同啲行裝比較重之外。
車卡入面其實好窄，一抽二㨢嘅我哋唔想阻住人所以好快揾啱車廂放低行李。我哋坐嘅係二等車廂，四個人一個廂，今程我哋買咗單邊一上一下嘅床舖，下格床可以反起喺床下底放置大件行李，好在我哋嘅大背囊都啱啱擺得落，其餘較細件嘅行李可以放上上格床嘅床尾。唔知我哋嘅同房係咩人呢? 定係其實冇人呢? 心情都變得又緊張又興奮，就好似小學第一日返學唔知邊個會坐你隔離咁嘅感覺。
好在我哋嘅大背囊都啱啱擺得落
有氣派嘅西伯利亞鐵路扎門烏德站大堂
候車區牆身掛滿咗蒙古國嘅風景畫
不過就冇乜人留意佢哋
冇幾耐就有人行入嚟啦，係一位高大嘅男士，孭住一個輕便嘅背囊同拖住一件細行李。我哋即刻好客之道用英文同佢打聲招呼，簡單互相認識一下大家叫咩名同喺邊度嚟。原來佢係一位蒙古國人叫 Onon，今次因為公事出遊去俄羅斯嘅伊爾庫茨克。佢嘅英文好好，原來佢又係細出國讀書留學。
冇幾耐又有多一位外國嘅女士行入嚟，我哋又再重複一次好客之道。呢位女士叫 Maria，行裝都係非常簡單，係下格床嘅朋友。佢哋講講吓好似好投契，重開始用俄文講嘢添。咁啱火車開始行我哋就話想出去影吓相就行開咗。
我哋喺窗前望著火車慢慢離開火車站，喺呢個時候梗係拍得片嘅就拍片，影得相嘅就影相，目送蒙古國嘅烏蘭巴托離開。眼前望見遠方喺係山坡上面彩色嘅木屋同蒙古包又係另一番感受，離開城市越遠嘅地木屋同蒙古包就越散落，間唔中你會見到一群牛或者一群馬喺草地上食草散步。佢哋日日對住咁靚嘅景色，又可以喺咁大片草地四圍跑做運動搵靚草食，應該係世界上其中一群最開心快活嘅動物。
睇完風景我哋梗係由車頭行到去車尾睇吓架火車係點樣，我哋對餐卡特別有興趣因為我哋之前上網見到唔同嘅火車餐卡都有唔同特色，有啲鋪曬枱布有曬佈置好有氣氛咁樣。除此之外都八掛想睇下其他車廂同啲人係點樣。每卡車都有一個熱水缸可以裝滾嘅食水，前後都各有一格厠所，垃圾桶在車箱嘅後方，兩腳嘅電制位就喺車廂走廊，不過用唔用到就要睇你彩數。
車卡過車卡之間嘅感覺令我唸起打生化危機 2 嘅情境，當你喺行出車卡你會感受到強風吹你面，低下頭你會望到條路軌閃得好快，耳朵只聽到車轆同路軌互相磨擦嘅急速又有頻密嘅隆隆巨響，全身感受到火車強烈震動，好似去咗超觸感嘅 4D 影院。可能係太逼真感覺太刺激一吓子受唔住，每次行經都有少少怯。好在屍殺列車當時仲未上畫，如果唔係可能要攞返支棒球棍先搭火車。
我哋行過其他嘅車卡，當中有一團韓國遊客，其他應該都係自由行遊客或者要兩地工作嘅人。不過其中一卡有陣強烈嘅異味攻入你的鼻，經過嘅時候都要閉氣。一等車廂感覺就好簡潔，大部分都係關起度門冇咩人會企喺走廊，行過昅到房入面空間其實同我哋一樣大，只不過冇咗上格床。
大鄉里出城嘅我哋咩都覺得新奇有趣，就連廁所洗手嘅水龍頭都有得玩一餐，要認真硏究咗一陣先識用。上咗火車成個人都變得好敏感，成日都好似感覺到出面涼浸浸，成日都要耷低頭睇吓火車到站未，為火車未到站感到焦慮。因為火車會喺唔同嘅站停車，但要視乎係大站定細站，細站可能停幾分鐘，大站就可以停超過 20 分鐘。唔想鬱喺架車度都可以襯佢埋站嘅時候落車落月台行下，我哋都喺一個站停低嘅時候落咗去行。
每一卡都有一位車長當值，負責一切大小事務。佢會派獨立包裝嘅床單枕頭袋被袋畀你，用完要自律將佢哋除返嚟畀佢哋回收，仲要摺好床單被鋪同枕頭。耐唔時車長會巡車卡賣嘢飲埋嘢食。唔經唔覺原來我哋行出嚟成兩個鐘，係時候行返入房。
舊式熱水缸可以隨時裝滾水
火車到站可以出去逛
好窄但好有氣氛嘅二等車卡走廊
獨立包裝嘅床單被袋枕頭袋
原來佢哋已經準備食晚飯，我哋梗係即時加入。我哋有辛辣杯麵加大版，Onon 有韓國版嘅即食粥加蒙古國香腸，Maria 有麵包同白烚雞。Onon 見 Maria 得咁少嘢食就攞多個即食粥畀佢，氣氛非常融洽。我哋攤開曬自己啲食物喺枱面度互相分享，Onon 仲攞埋佢把私家軍刀分腸仔畀我哋食，有得加餸用食物外交真係坐長途火車最好嘅經歷。
我哋好奇問 Maria 隻雞喺邊度買原來嘅佢自家製，真犀利。我哋就貢獻咗生果畀大家做飯後果。我哋問佢哋點解架火車上邊冇餐卡，佢哋話當我哋半夜過境俄羅斯嘅時候先會喺車尾扣上餐卡，聽朝起身就可以去食早餐。喺未過境之前我哋仲喺蒙古國範圍，車上只有小食提供或者要食自己嘅糧倉。
食飽飯我哋四個就坐喺車上傾偈傾到半夜過境。原來 Maria 嘅母語係俄文，又好耐冇講過英文所以怕講得唔流利，咁啱 Onon 又識得講俄文所以之前就同佢用俄文傾計。但我哋加入咗之後英文就係我哋唯一四個共通嘅語言所以我哋都係用英文溝通。
食物外交 -- 有豬肉味嘅蒙古國香腸
返到車廂原本佢哋已經準備食晚飯
突然間 Maria 用普通話同我哋講你好嗎，仲問我哋識唔識得講。佢話佢嘅囡囡而家去咗中國留學，學緊國語，但好擔心佢喺嗰邊唔適應又唔識同人溝通。當火車停下來靠站嘅時候先收到訊息，就係呢個時間 Maria 就打電話畀佢囡囡同佢傾計，佢仲想我哋同佢囡囡用國語傾計睇下佢溝唔溝通到。我哋就派出 Simmy 呢位外交大使同佢囡囡講電話，雖然係簡單幾句問候同談話但係好有意義，我哋同返 Maria 講同你囡囡用國語講電話完全冇問題， 係嗰邊學習同生活都好好叫佢唔使擔心，佢臉上即時露出去安心甜蜜嘅笑容。
因為 Maria 住喺俄羅斯我哋就問佢邊間電話公司開 SIM 卡好用啲，佢就介紹咗一間畀我哋聽仲好精明咁同我哋講咗些小貼士。原來係市區有一啲冒牌嘅電訊商扮正牌公司呃人，又有一啲正牌嘅電訊公司嘅月費計劃只係局限係某一個地方，俄羅斯咁大，當你去到另一個城市就會收唔到用唔到。佢仲形容咗佢推介間公司嗰個 logo 係咩樣，係一隻白色雞蛋係紅色嘅背景上面 ，之後我哋就會攞住呢啲線索去搵呢間舖頭出嚟。
佢仲提醒我哋一陣俄羅斯海關會凌晨半夜上火車幫我哋做入境嘅手續，要方便佢哋做野千祈唔好放行李喺上格床或床未嘅貨架。咁我哋就即刻將所有行李集中放曬喺下格床。
而 Onon 就喺蒙古國嘅一間旅遊公司做，今次佢公司咁啱有一位女導遊第一次帶團去俄羅斯，而佢又識講俄文所以今次就隨團從旁協助一下。我哋諗喺隔籬車卡嘅韓國遊客可能就係佢嘅團友。 佢就介紹咗一個好有用嘅旅遊 apps 畀我哋叫 map.me，只要之前下載咗地圖之後就算冇網絡都可以睇到地圖，多咗一個旅行好幫手。
講講下火車就慢慢停咗落嚟，應該到咗邊境等海關上嚟做入境手續。喺半夜凌晨一個精神狀態非常脆弱嘅時候第一次對住戰鬥民族真係有啲緊張，佢哋嘅檢查非常認真，我哋見到車外有人用電筒仔細檢查火車軌火車底同火車嘅四周圍。我哋都攞住自己嘅護照準備做入境手續，我哋仲互相交換護照睇，佢哋對於特區護照防偽嘅特徵最有興趣。
冇幾耐就有人去到我哋嘅車廂，係一位好高著住軍裝嘅俄羅斯男人，佢攞住一部好似平時碌卡嘅機喺手。首先檢查 Maria，之後到 Onon，本身氣氛都有啲緊張，佢哋開始傾計仲有講有笑。之後到我哋，不過佢冇問問題。突然間有另外一位軍裝嘅俄羅斯女軍裝同一隻狗入咗嚟檢查行李，佢兩三下手勢就擒咗上去上層檢查，身手敏捷。然後佢逐一要求我哋睇下啲行李，Maria 睇手袋，Onon 睇背囊，我哋就睇喼。檢查過冇問題男軍裝就用咗我哋本護照碌卡同蓋印，我哋正式順利入境俄羅斯，個印仲要有架火車添。
最後大約凌晨兩點半我哋終於可以上床休息，我哋臨瞓前同 Maria 講咗拜拜同保重先，因為佢會坐多兩三個站，天未光就會落車。雖然係咁，佢都有熄燈同我哋一齊休息瞓覺。冇幾耐我就瞓著咗，第二朝起身連佢落車我都完全冇醒過。
二等車廂四人房嘅下格床