坐上由東向西嘅西伯利亞鐵路看東西（中）

烏蘭巴托 ULAANBAATAR → 伊爾庫茨克 IRKUTSK（~24小時）

第二朝一起身我哋就去咗尋晚神秘扣上嘅俄羅斯餐卡睇吓，途中撞到 Onon 迎面而來，應該都係啱啱去完餐卡食早餐。朝早火車途經全世界最深嘅貝加爾湖 Lake Baikal，有湖景送早餐真係要行快兩步。不過要行去餐卡要大大力咁開關十幾度門真係想快啲都冇辦法。

終於嚟到餐卡，地方唔大，只係有八個四人座嘅卡位。車廂佈置得幾有氣氛，四圍你會見到好多唔同嘅花紋：掛燈嘅支架，椅背上嘅雕花，窗簾同枱布，加上懷舊嘅地板一切都配合得好和諧。我哋搵咗一個可以望到湖景嘅位，冇幾耐俄羅斯侍應叔叔就攞咗本餐牌比我哋。因為價錢唔平，所以我哋一人嗌咗一樣嘢，就慢慢坐享受吓個環境同風景。

我哋嗌咗個經典俄羅斯羅宋湯同平凡煎蛋，呢盅羅宋湯特別用咗個好保暖嘅窄口闊身湯壺，湯嘅顏色比平時嘅偏暗紅色。仲有比起平時多好多湯料，最正都係灑喺湯上面嘅酸奶油同醒神香草，總之就係特別好食不過份量有啲細，所以其實有啲貴。

我哋坐多一陣慢慢就有多幾枱客人，不過都係坐唔滿。坐我哋隔離枱係兩位好好笑容韓國叔叔，攞住部相機特登過嚟飲啤酒睇風景。我見佢哋幫對方影相好似好鍾意呢度，就用英文同佢講不如我幫你哋兩個影張相，佢哋好開心仲一定要幫返我哋兩個影返相。好有趣嘅係我哋之後係去貝加爾湖嘅碼頭撞番佢哋，不過我哋離好遠所以冇打招呼，點知差唔多跨過半個地球去到芬蘭嘅火車站又再次遇到佢哋，有緣到咁好難唔搵佢哋影張相留念。

更有趣嘅係呢張無意拍下嘅主題相片中有另外一對遊客，我哋喺貝加爾湖一個 Day Trip 撞到，住喺同一個地方，仲要同一班火車由伊爾庫茨克 Irkutsk 坐去葉卡捷琳堡 Yekaterinburg 。Aoife (著住綠色風褸) 同 Lousie (著住紅色 T - shirt) 都係喺香港教書，一個係愛爾蘭人，一個係英國人，佢哋趁住放暑假就去旅行四周圍玩。佢哋之後搵返喺餐卡度影嘅相 (右邊下方嘅相) 真係見到我哋，真係一次難忘嘅奇遇。

最後我哋坐到冇湖景睇就嗌埋單，但係我哋冇俄羅斯盧布喺身，只有美金同信用卡。初頭諗住佢哋唔妥美國未必會收美金，點知佢哋放下成見發揮有生意無敵人嘅精神收咗美金。

Louise 之後搵返喺餐卡度影嘅相真係見到我哋 — *Louise 之後搵返喺餐卡度影嘅相真係見到我哋*

返到去車廂，我哋仲有一大朝早嘅時間喺火車上面，於是繼續我哋同蒙古國 Onon 嘅外交工作。佢對我哋身上面嘅裝備好好奇，好似 GoPro 同 stablizer、可以變形摺疊嘅露營裝備等等，當佢睇見 Simmy 嘅 Aeropress 神器我哋就進行咖啡外交。飲食文化，地方語言，旅遊經歷永遠都係最容易打開話題，下次你哋坐長途火車記住要準備多點特色食物交換分享。

講開食物佢就問我哋啲嘢食喺邊度買? 我哋就話屋主教我哋去一間好似「城市 super」 嘅大超級市場買。佢一聽到就話嗰度買嘢比較貴，好少本地人會喺嗰度買嘢，佢話喺火車站後面有個蔬果市場，可以買到又平又靚嘅生果，好彩我哋屋企唔近火車站都冇咁嬲。

之後我就同佢講我哋住喺邊，好奇問問附近有冇本土嘢買同嘢食? 佢隨口就講咗間平價嘅本土超級市場，仲有得食鹹奶茶餃子同牛奶稀飯嘅地道食店。我心諗又俾個屋主跣多鑊，呢啲先叫地道！呢啲先叫本土！呢啲先係我哋想要睇想去嘅地方！

既然佢公司係做旅遊嘅，我就問咗佢多啲喺蒙古行山露營嘅資料。佢仲俾我睇佢自己影嘅相，風景好靚仲要價錢一啲都唔貴。(八月份嘅 11 晚行程包一隻馬幫你攞重嘢都係大約 USD200) 下次再嚟蒙古，真係唔同佢報名都去公司睇下啲行程。

佢好奇問我哋落咗火車搵咗地方住未，我哋話係 Airbnb 租咗 hostel 住，不過我哋唔記得影低個地址，又未買俄羅斯 SIM 卡，所以要上到網先知道去邊。最後我哋落咗火車，佢帶我哋搭車、幫手攞行李仲去到 hostel 留低咗我哋先走，感覺好似遇返親切嘅蒙古包包主一樣。再次為友善嘅蒙古國人形象加分，想知道詳情就要留意我之後關於俄羅斯嘅分享。

Onon 睇見 Simmy 嘅  Aeropress 神器我哋就進行咖啡外交 — *Onon 睇見* *Simmy 嘅* *Aeropress 神器我哋就進行咖啡外交*

伊爾庫茨克 Irkutsk → 葉卡捷琳堡 Yekaterinburg（~50小時）

我哋落咗火車會喺伊爾庫茨克 Irkutsk 嘅市區同貝加爾湖 Lake Baikal 分別留兩晚，喺第五日嘅朝早5點去返火車站坐 50 個鐘頭火車去位於歐亞板塊交界嘅城市葉卡捷琳堡 Yekaterinburg。我哋喺火車站見到喺貝加爾湖新認識嘅 Aoife 同 Lousie，仲約咗佢哋夜晚喺餐卡度見。佢哋兩個坐頭等房，我哋就繼續坐三等，不過今次兩個都揀瞓上格床。

我哋喺月台睇真啲張飛先發覺今次認真大鑊，原來車廂嘅號碼係唔同?! 都冇辦法唯有上咗火車先算，可能冇我哋想像咁差呢。因為我哋上車嘅時候係朝早 5 點幾，車廂嘅門全部都係閂住。

我敲一敲度門就拉開度門，不過我拉極都拉唔開，我估入面可能反鎖咗。咁我就返轉頭睇下 Simmy 嗰邊係點，佢嗰邊就有三個男士，兩個亞洲嘅後生仔，同一個赤膊瞓覺嘅外國叔叔。之後我就搵咗我果卡嘅車長過嚟幫手開門，我一打開門就成個人灰咗。一家三口嘅俄羅斯人正喺度瞓覺，喺開門嗰一刻就有個男人起咗身，眼神好唔友善咁怒啤我。我都知阻人瞓覺同阻人發達都會俾人燒 Pocket，所以我好快放個喼落床下底，再用盡力抬個大背囊上上格床，就同佢哋講聲唔好意思唔該曬，就閂埋道門。

一朝早就好似發惡夢咁，一時間我哋都接受唔嚟。諗住過去餐卡坐吓定吓神，點知因為太早仲係鎖住。成架火車容納到我哋嘅就只有車卡與車卡駁住嘅地方，我哋開始就咁企喺度食早餐諗辦法。我哋想像唔到之後嘅 50 個鐘可以點樣過，真係連坐嘅地方都冇，只可以打橫瞓喺上格床。其實如果係同一間房都冇所謂，但唔知點解我哋係一齊買車飛但係分開房。所以我建議大家如果有機會坐長途火車，點都要揀張下格床，因為你點都有個位坐同有較大嘅活動空間。

咬咗兩啖麵包但真係冇胃口食，之後我再去搵車長問吓，會唔會可以幫我哋換床，只要兩個人喺同一間房就可以，佢行開咗試吓幫我安排。冇幾耐佢返轉頭話所有床位都滿曬，我就即刻追問如果轉一等房呢? 但係佢都係擰擰頭話冇。

佢走咗之後我哋繼續企喺嗰度發呆。轉個頭車長同另一位職員行過嚟，佢話搵到一間房叫我過去睇下。我哋聽到之後成個人醒曬就跟住佢行，我哋行咗去兩卡之外嘅車廂，原來佢係隔兩卡嘅車長。一拉開門原來係一間預留俾傷健人士嘅特別車廂，地方超大，有多啲嘅扶手仲要有電視機。喺接近絕望嘅我見到呢間房即刻話轉房，就係咁我哋就意外地加錢變咗瞓一等房。

一大朝早明明坐火車，但係心情就好似坐過山車一樣，好好彩總算解決到問題，可以安安樂樂享受呢兩日係火車上渡過嘅西伯利亞鐵道旅程。入到車廂我哋即時攞咗我哋個糧倉出嚟，放喺枱面晒冷，胃口仲即刻返晒嚟。

喺火車上面其實可以有好多嘢做，睇風景，整嘢食，Back up 之前影過嘅相拍過嘅片，出吓 post，計劃吓下個站去邊度，喺火車上四圍行，火車到站時落火車四圍行買嘢食，去餐卡坐識吓新朋友又或者咩嘢都做等等。

好快就到晚飯時間，我哋就去餐卡會合 Aoife 同 Lousie。原來佢哋都識咗啲新朋友，Natalie 同 Christian 好鍾意認識唔同地方嘅文化，對世界各地都好好奇嘅德國人。Jessica 係識得講好多種語言嘅瑞士人，因為係聯合國做嘢，所以要成日去唔同地方工作。我哋一共有七個人分咗兩張枱坐，佢哋全部都好友善，鍾意四圍去旅行遊歷嘅人。

天南地北，無所不談。我哋有硏究攞住唔同嘅護照可以免簽證去幾耐同去到啲咩地方，仲有講到唔同國家嘅工作模式同待遇，有一番深層次嘅交流。講到食嘢，我哋張二等房嘅車飛係包晚餐嘅，不過份量真係細過兒童餐。

食唔飽唔使怕，我哋各自喺房帶咗些唔同嘅小食一齊食，有車厘茄、果仁、花生同咸餅乾。我哋講開坐西伯利亞鐵路之前，原來有幾個都去咗蒙古國。Aoife 同 Lousie 仲買咗幾隻成吉思汗嘅 vodka shots glasses，咁啱我哋又買咗伏特加，於是我哋就六個抽乾咗一支迷你版嘅金裝成吉思汗。

雖然度數好高，不過口感好醇好滑，唔會一味燒喉嚨。真係酒香有特色，飲開有感情嘅高質素伏特加。因為聽朝 Aoife 同 Louise 會最先落火車，我哋約咗一齊食早餐，順便同佢哋送行。