磚頭上嘅遊牧民族－烏蘭巴托市區（下）
蒙古國最驚險刺激的旅程 一 跳蝨市場
接住落嚟就係去我哋去蒙古國最驚險刺激的旅程 一 跳蝨市場。平時喺屋企周圍行都係步行嘅距離，呢個跳蝨市場如果要行應該都要行一個鐘，不過我哋今日已經冇時間行過去。車程大概要 15 分鐘，如果我哋要過去就要決定坐巴士定係坐的士。無論我哋坐咩去都好，我哋出發之前已經搵咗好心嘅蒙古英文書店姐姐幫我哋寫咗跳蝨市場嘅蒙古文當錦囊用，方便溝通。
坐巴士嘅好處就梗係平又最能夠體會到當地人嘅日常，但係我哋唔知道要坐幾多號車，又應該冇人會識得用英文教我哋，車上面會好逼可能會有危險；如果搭的士就梗係最直接，但係會貴，又有可能會畀人呃，言語不通又可能會唔知道車咗你你去邊度嘅危險。
喺我哋面前出現咗幾位 Student Police
但諗諗下如果坐的士去個咁本土嘅跳蝨市場又好似唔係咁啱，就係呢一個決定性的瞬間，喺我哋面前出現咗幾位 Student Police，於是我哋就上前用英文問路。佢哋教路話坐的士去會好貴，佢哋平時都會坐巴士過去，佢哋諗諗下應該坐幾多號車嘅時候，突然轉身一望後面個巴士站就話係呢㗎啦，仲想跑過去幫我哋追巴士。我立即轉身講聲多謝同好似 Super Hero 咁話「交畀我就可以」之後再轉身提腿擺臂追巴士，最後當然成功登上。
氣都未回好我就攞個錦囊出嚟問司機，佢講完一堆蒙古文又噏下頭咁我就當佢係，當然仲因為我信學生警察係唔會呃人。上到巴士全部都係本土嘅蒙古國人，有大有細有老有嫩同埋有啲迫，我哋即刻開住個 google map 睇住落車。
車上面嘅人對我哋都冇奇異嘅目光，好似都懒得理我哋，總算成功融入咗。我哋將貴重嘅嘢都搵放喺前面仲手噤住，一切還好。果然大約 15 分鐘之後我哋就落車，但一落車係塵土飛揚嘅街道並唔係市場，我哋跟住人流行好順利就搵到市場嘅入口。
未入去市場之前有一個好大嘅露天停車場，人多車多都唔知邊度先係入口，於是我哋就跟住幾位大媽左穿右插加多幾個假身就成功搵到入口。
巴士上全部都係本土嘅蒙古國人
有大有細有老有嫩同埋有啲迫
一次晒你冷嘅廿張砌好嘅床架連床褥仲有梳化床
一次晒你冷嘅廿張砌好嘅床架連床褥仲有梳化床
成個跳蝨市場應該有兩個維園咁大，感覺就似喺度行緊兩個維園咁大嘅鴨寮街加女人街。近入口嘅呢一邊賣啲大型嘅家具：有成張砌好嘅床架，床褥，梳化床，蒙古包嘅火爐連煙通…… 好似一個露天嘅貨倉，第一眼見到真係幾震撼。
再行入啲又有其他嘢賣，有單車，零件工具，二手衫褲，餅乾糖果，衫褲鞋襪袋，冒牌運動鞋等等。初初都覺得幾新奇，但呢度同我哋心目中嘅跳蝨市場都有好大分別，而且喺入面嘅人開始對我哋有奇異嘅目光，喺市場四圍行行企企嘅人，佢哋都做緊一樣嘢但係又好唔專心咁望住我地。如果係香港就唔使驚因為佢哋都係差人，但呢種感覺係好似一啲動物準備畀人獵食一樣咁難受，慢慢感受到安全有啲問題。因為咁嘅原因，我哋冇咩攞個電話出嚟影相，分分秒秒都保持最佳警覺狀態，只係留咗一陣就想走。
屋主話我哋走嘅時候可以打畀佢嚟接我哋去食飯，我哋喺個市場嘅中間搵到一座四層樓高嘅室內商場，喺入面可以暫時避吓風頭等保姆車接送。不過原來英文都唔係咁好嘅佢或者係我同佢講咗成半個鐘先搵到我哋，見到佢同佢仔仔嘅出現總算鬆一口氣。今日的經歷實在太多，接住落八淨係想好好地食餐飯就夠。
上咗車之後屋主就帶我哋去食地道蒙古燒烤，可惜最後係失望而回，仲要係好失望。首先嚟到佢所講嘅餐廳不過原來已經執咗幾個月，冇所謂啦咪轉地方囉，我哋同佢講只要係食到地道傳統嘅蒙古餐就得。
之後我哋去第二間餐廳類似 「Little 肥羊」 咁嘅格局，應該係有好多羊肉打邊爐嗰啲。我哋四個人開咗張枱坐低咗，以為可以嗌嘢食點知佢睇完餐牌之後再問部長有冇烤羊肉，好明顯答案係冇，佢就話好想帶我哋食烤羊肉所以話不如轉第二間。其實我哋都真係冇問題，但見佢咁堅持咁就跟住佢走。
喺呢間餐廳步行 5 分鐘我哋嚟到第三間餐廳，呢間餐廳裝修同格局好好似 「Ruby 星期二」 咁嘅格局，分明係食西餐鋸扒。我哋入咗去一陣打咗個圈咁啱冇人招呼，我哋就話不如去返頭先嗰間啦，呢間完全唔係食蒙古餐喎。之後佢繼續堅持話唔好，硬係要帶我哋去其他地方。
之後我哋四個就行出呢間舖頭上返車去搵第四達地方，但係佢好似冇乜頭緒之後就話要行開一陣叫我哋留喺車上面等佢。我哋諗真係食乜都冇所謂因為已經好攰好肚餓，所以我哋就夾定只要第四間唔係食牛歡喜羊歡喜嘅我哋一於照食。轉個頭佢就返上車，好似搵到新目標咁。
開車行多15 分鐘我哋終於嚟到第四間餐廳，我哋心諗一定係呢間唔再轉。點知我哋嚟咗一間叫 Mongolia Barbecue 蒙古燒烤 嘅好似連鎖嘅餐廳，一入到去又係奶嘢。坐得喺入邊食野嘅全部都係遊客，個格局似足灰心時刻 Pizza 嚇，仲要有個沙律吧添。但係佢冇越過我哋底線食牛羊歡喜，只不過食唔喜歡嘅嘢，加上我哋已經冇心冇力再去其他地方就只好坐低食飯。
呢度食嘢類似半自助餐形式，你可以喺沙律吧攞一碗裝到幾就幾多嘅沙律做前菜，然後又可以裝一碗畀你攞得幾滿就幾滿嘅肉，牛羊雞豬同埋唔同嘅醬汁醬料都可以自己揀，之後就交俾廚師喺你面前用一塊大過去飲坐到十四個人果張枱嘅平底熱鍋炒熟再配搭小小雜技。
不過我之後搵返啲資料原來呢間餐廳並唔係蒙古國嘅傳統食店，佢只不過係台灣改良北京烤肉嘅中式燒烤連鎖食店。有冇搞錯，我哋想去食地道蒙古嘢食啫，唔係想食一些個名叫蒙古但唔係食本土蒙古國餐嘅嘢食。我真係非常懷疑佢係咪喺度住，係咪一個經營咗幾代家族生意嘅導遊。
我哋嘗試喺呢個地方代入享受環境不過我哋失敗咗，唔知點解屋主睇嚟睇去都冇嗌嘢食，最後只有我哋三個食嘢。佢好似唔識嗌嘢食又唔知咩可以叫咩，佢仔仔咩都想食，除左食沙律吧仲走去甜品部攞甜品食，但我哋個餐係唔包嘅，所以職員見到都上前同佢講，講咗兩句都係繼續食。
到我哋就快食完嘅時候佢行開咗去餐廳嘅另外一邊講電話，都講咗好耐講到佢個仔都唔耐煩叫佢返嚟，之後我哋就嗌埋單。 當張單嚟到嘅時候佢完全冇意慾攞銀包俾錢，咁我就攞張信用卡碌卡，心諗佢之後會畀番我嘅 。
碌完卡之後佢問我攞返張單，但到最後佢係冇俾過錢我，連多謝一聲都冇講句。我個心真係好唔 gur，唯有當請小朋友食飯，但佢哋屋企咁富貴根本就唔使我請啦。我見佢咁即即刻想 R 返佢聽日送我哋去火車站當車費，點知佢話聽日要接兩個外國大客仔然後陪佢哋去戈壁沙漠玩一個禮拜。佢話會叫佢老婆幫我哋手 call 車去火車站，我承認佢奇怪嘅行為的確令我對美好嘅蒙古國印介蒙上污點。
蒙古國最大嘅藏傳佛教寺廟甘丹寺 (大門正面)
甘丹寺 (大門後面)
主殿內有一個好高嘅觀音菩薩像
第二日瞓醒我哋下晝先至坐西伯利亞鐵路離開蒙古國，所以我哋仲有一朝早嘅時間自由活動。今日我哋預多咗時間可以步行去蒙古國最大嘅藏傳佛教(喇嘛教)寺廟甘丹寺，蒙古國人有冇大事都會嚟呢度嘅重要精神領域，所以如果你要進入重要嘅範圍係要收入場費。
喺園內你會見到誠心嘅教徒祈福，遊客四圍影相，奇怪人四圍望仲有四圍都見到嘅喇嘛。喺主殿有一個好高嘅觀音菩薩像同埋轉法輪，因為見到不准攝影嘅標誌，又怕影響其他人所以我哋冇喺室內影相，只係用眼睛靜靜觀察參觀一下。
園內嘅建築同設施都好樸素甚至有多嘅油漆都係剝落嘅，正好配合出家人嘅簡樸生活，陳舊中帶一點味道。我哋今次好好彩喺一間細嘅寺廟見到喇嘛正喺到誦經，我哋行入去沿住牆邊嘅座位坐低，佢哋特登開放咗最後一排畀遊客靜靜坐低參觀。我哋坐咗一陣就有個小喇嘛示意我哋繼續沿住牆邊嘅座位向前行畀新一批人入去參觀，雖然冇文字指示同說話但係我哋溝通到。
園內外都有好多白鴿聚集，係另一個景點。我哋短暫逗留咗一陣就去咗超級市場買咗支金裝嘅成吉思汗伏特加壯〝陪我哋去旅行，之後就返屋企執行李去火車站準備坐西伯利亞鐵路離開蒙古國去戰鬥民族俄羅斯。
好好彩喺呢一間細嘅寺廟見到喇嘛正喺到誦經
總括嚟講蒙古國最吸引人嘅地方都唔係喺磚頭上面。喺稍為遠離城市嘅草原你仲可以搵到原本屬於遊牧民族順應自然嘅樸素生活，同動物共融相處，好客熱情同互相尊重嘅特性。
但佢哋都面臨好大嘅國家發展問題，由傳統走向現代化嘅城市發展重大轉型。全國有三百萬人口但係有三分一人都係集中住喺首都烏蘭巴托，城市人口急速增長但係基建規劃未能配合。喺首都附近嘅山坡上其實聚居咗一大片簡陋嘅木屋或者係破舊嘅蒙古包，好多連基本嘅道路設施都未做好，終日塵土飛揚又或者落完大雨會出現大積水，貧富懸殊情況嚴重。
蘊藏豐富嘅天然資源嘅蒙古國正開放吸引外資並推行鼓勵生育政策，希望經濟同人口都有迅速增長，當中必定會出現好多新舊對比嘅矛盾，希望蒙古國喺發展嘅同時一定要平衡自然生態，環境保護同好好保存少數民族嘅傳統。因為博大寬廣嘅大自然，反璞歸真嘅遊牧民族生活模式先至係值得人欣賞同敬畏嘅真蒙古國。