磚頭上嘅遊牧民族－烏蘭巴托市區（上）
烏蘭巴托市區重要景點 — 成吉思汗大廣場
話咁快我哋就喺烏蘭巴托近郊嘅大草原住咗兩晚，之後留喺蒙古國嘅時間都會留喺烏蘭巴托市區。我哋走嘅朝早開始烏雲密佈，仲開始刮起風，唔知道打風落雨嘅日子喺草原嘅生活又係點嘅呢? 我哋走之前同左包主，佢嘅妹妹同埋司機叔叔影咗大合照留念，之後再用 facebook 發送番啲相畀佢哋。
喺大草原出返市區我哋用咗超過一個鐘頭嘅時間，越近市區塞車就越嚴重。包主好好人要親手送到我哋俾下一個屋主先放心，最後仲送到我哋入屋先走，好鍾意佢嘅好客精神。我哋都懷著呢一份蒙古國好客之道精神期待我哋下一個屋主都係咁，不過我證實好嘅原來都唔係必然。
我哋入住嘅地方係市區入面一棟
十層樓高嘅大廈
我哋呢一間喺城市入面嘅屋都係喺 Airbnb 租嘅，不過當中嘅過程就有啲奇怪。話說精明嘅我哋喺 Airbnb 搵屋就梗係睇清楚曬啲評語先，考慮過租金，環境，地點我哋最後決定揀咗呢一間女房東，點知喺我哋臨入住前嘅兩日突然收到女房東通知我哋話佢唔會喺屋企，變由佢嘅細佬去招待我哋。
好明顯如果 Airbnb 嘅房東係男人絕對係我哋嘅次選，佢叫我哋放心仲話佢細佬之前喺外國讀書而家都同佢一樣做本地導遊接待好多外國遊客，用英文溝通絕對冇問題嘅。其實去到呢個時候都冇得話唔得，你話點就點啦。
由露台望出去嘅景觀
喺香港臨出發都要帶條繩以備不時之需 睇吓宜家幾用
我哋入住嘅地方係市區入面一棟十層樓高嘅大廈，之後先發現原來應該係屬於有錢人嘅地方。屋主一家四口有一個讀小學嘅仔仔同一個好細啱啱學緊行嘅小朋友，佢同仔仔嘅英文都 ok，不過太太就唔太識英文，又或者佢係唔想溝通。
我哋住喺其中佢哋間屋嘅其中一間房入面，環境唔錯，有自己獨立嘅厠所仲有個小露台。床邊仲有個電子鋼琴，我估應該係佢仔仔嘅房。原來開心可以噤簡單，其實我哋只不過見到得沖涼嘅厠所，好似之前都未試過有得沖涼係咁開心。之前坐火車坐巴士無得沖涼，喺蒙古大草原又唔夠膽挑戰，好在天氣唔係好熱。橫掂要洗衫，真係有諗過著住衫褲就衝入去沖涼加洗衫。
一間開揚嘅小房間堆滿兩個人六大件行李
地磗有平時好少見嘅形狀
如果要認識一個新嘅地方，我會從佢哋嘅貨幣著手，之後就係佢哋嘅超級市場同埋佢哋嘅公共交通工具，噤樣先可以體驗一下當地人平時係點樣生活。沖完涼之後我哋就問屋主邊度有本土平價嘅超級市場同埋本土地道有特色嘅地方有得食蒙古國餐。佢教我哋喺由佢屋企行去超級市場大約要 20 分鐘，但係食蒙古國餐嘅地方佢就識去唔識講，佢話不如直接帶我哋去，咁我哋就約咗佢聽晚去食晚飯。 講完之後我哋就攞住地圖行去市區四圍行，同埋去一間賣二手英文書店搵一位同我哋一齊坐上由北京開往扎門烏德黑巴認識嘅善良蒙古女士，因為佢我哋先可以成功安全到達烏蘭巴托，詳情之後我會寫一篇前傳來詳細講我哋黑巴嘅黑暗經歷。
喺市區入面大部分嘅建築都唔高，地磚有平時好少見嘅形狀，街道上大沙塵，店舖招牌主要係現代嘅蒙古國文同埋英文。我哋見到有一座好有氣派嘅建築，望真啲原來係好大嘅百貨公司，入面有你喺香港廣東道見到嘅大牌子。我哋諗緊會唔會可以用到蒙古國嘅消費水平買到名牌子貨品呢? 一入去睇個銀碼再對返匯率就嘩咗一聲，頂 ! 原來係一樣，果然係國際大品牌，去到世界各地都保持到個價嘅穩定性，我心諗真係喺蒙古國有邊個會買得起，之後我哋就收起咗一絲嘅天真繼續行街。
我哋嘅晚餐就喺落地搵咗一間好平民嘅餐廳食，個樣是是正正都有本地人幫襯。店舖好似麥當勞嘅 counter 上面有食物嘅相方便你去嗌嘢食，不過我哋就挑戰難度，我哋對清楚張相同埋餐牌嘅蒙古國字用蒙古國餐牌點餸。
啲嘢食一嚟就有驚喜啦，我哋叫咗啲唔係本身想要嘅嘢食，不過我哋又冇乜野唔食，同埋要為懶醒付出代價，安然吃下呢個有趣經歷同驚喜。店舖仲有一樣正嘅嘢就係佢哋嘅音樂，佢哋播緊廿年前最流行嘅美國流行曲，好似有後巷小子 Backstreet Boys 。呢種崇尚西方但係好似時光倒流 20 年嘅環境空間感覺好奇怪好搞笑。
街道上嘅食肆除咗蒙古國餐其實仲有唔少嘅韓國日本俄羅斯同中國嘅餐廳，蒙古國都受唔少亞洲鄰國地方嘅影響。
本身想要個羊肉乜乜乜點知叫咗個羊肉夾餅
店舖招牌主要係現代嘅蒙古文同埋英文
食完飯就梗係繼續四周圍行，我哋之後去咗超級市場。蒙古國嘅超級市場同內蒙古嘅一樣，喺入口之前有一排儲物櫃，你一定要放低個袋先可以入去。
呢度嘅超級市場都真係好大同好多嘢買，我估我哋去咗好似香港 「城市 super」 嗰種比較高級嘅超市，都算係一個唔錯嘅景點。佢哋同一種貨品有好多好多嘅選擇，分量仲要係比一般嘅大。我哋見到有好多好多多糖，朱古力，即沖鹹奶茶，奶類製品，羊尾脂加紅棗，即沖馬奶酒，啤酒同烈酒。 不過佢哋嘅價錢都唔算平，而且有部分嘅嘢飲嘢食我哋之前都已經好地道的家庭試過所以無特別消費，只係賣咗少量嘅乾糧準備坐西伯利亞鐵路。
由於日照時間非常長，我哋行到九點半個天先慢慢開始轉暗。天黑嘅時候喺市中心行路返屋企感覺都尚算安全。
即沖馬奶酒
即沖鹹奶茶
羊尾脂加紅棗
第二朝早我哋同屋主傾左一陣計，希望了解吓當地人嘅生活。但講開先知原來佢哋應該都算係蒙古國有錢嘅人。佢嘅家族生意就係幫人安排蒙古國旅遊，到佢同佢家姐應該係第二代。佢哋客廳有張大地氈，電視機，電子鋼琴，成吉思汗畫像，馬頭琴，騎馬嘅裝備仲要每年去一次外地旅行，香港新加坡日本台灣都全部去過曬。
我哋今次淨係租佢間房可能算係好小數，感覺上係冇乜機會畀佢賺錢所以感覺相對比較冷淡，好似凡事都係以錢為先，非常現實，完全唔似係一個想同人溝通交流熱心嘅導遊，同蒙古包包主每次都想將蒙古國最好嘅一面話畀你聽嘅真誠感覺差好遠。
佢通常會幫人租車租地方去蒙古國嘅近郊甚至去一個星期以上嘅行山露營或者係戈壁沙漠團，一個人做導遊，帶住最多四個人。從佢口中得知蒙古國的戈壁沙漠絕對係佢哋嘅自然生態後花園，不過如果我要去都一定唔會跟佢去啦。
我哋今日喺市區行程緊密，要去國立蒙古歷史博物館，成吉思汗大廣場，搵地方去攞上網買咗嘅西伯利亞鐵路車飛仲有最精采嘅蒙古國本土嘅跳蝨市場。博物館值得去; 大廣場因為必經所以一去無妨; 攞車飛嘅地方原來轉咗地址成兩年佢哋確認你嘅 email 留低俾你嘅聯絡地址都係錯。好在我哋有本地電話卡即刻打電話俾佢哋先搵到啱嘅地址先成功攞到車飛，好在冇中伏。所以出門旅行最好都係預多啲時間俾意外發生。
喺城市街頭去到邊都可以磅重乜乜乜
國立蒙古歷史博物館 仲有軍人行過
成吉思汗大廣場
我哋喺街頭見到一個好得意嘅情景，喺街上面有啲老人家坐喺街邊前面都放著一個磅，初初都唔知發生乜事。突然見到有一位年輕嘅蒙古女性上前付錢，然後企喺個磅上邊磅重。原來係俾一啲貪靚又注重體重的蒙古國人可以行到邊度到磅到邊度，俾佢哋磅重乜乜乜嘅。