大草原上嘅遊牧民族－烏蘭巴托近郊（下）
河邊有群牛 牛邊有隻馬 馬邊有個蒙古包 好天係噤樣
要起一個蒙古包 Mongolian Ger/Yurt 通常三個人大概用一兩個鐘都可以起好，設計好適合遊牧生活。佢哋唔會喺同一個地方起蒙古包，因為比蒙古包壓住嘅草唔可以生長，非常環保同人性嘅考慮。
佢哋佢哋會喺冬天同夏天轉地方住，當冬天嘅時候佢哋會搬去山後過冬，因為地形，風向同埋溫度都較適合人同埋動物喺冬天居住。蒙古包嘅門口唔高，要踏入去嘅時候同時間縮起個頭，避開門擋同門框，需要少少時間去適應。
內籠用木架支撐 油上鮮艷嘅顏色同花紋
呢幾日我哋有食神，食盡佢哋傳統嘅蒙古國食物。簡單嘅食物，新鮮嘅材料，用個心去煮，配合埋蒙古包呢個地道環境就係最好嘅蒙古餐！ 我哋飲過新鮮嘅熱氂牛奶，用氂牛奶同麵粉整嘅「黃色小饅頭」，氂牛奶粥，蕃茄青瓜刺身，蕃茄薯仔紅蘿蔔紅椒羊肉湯粉，蒸羊肉包，羊尾脂，羊內臟等等。雖然全部都無落洋蔥，但佢哋全部都係又黯然又銷魂，真係一試難忘。
佢哋全部都係又黯然又銷魂
冇草生嘅地方就係佢上次起蒙古包嘅位置
喺蒙古包嘅外圍睇感覺唔係好大，外圍通常會用幾層顏色非常樸素嘅羊毛包住，但當你踏入蒙古包一睇原來入面好有空間感同埋有好多顏色仲有唔同嘅花紋：內籠用木架支撐，油上鮮艷嘅顏色同花紋，圓形嘅空間放咗四張床同一啲傢俬簡單傢俬圍住個邊，中間有一個火爐同一支灌穿包頂嘅煙囱，包頂有天窗透光，日間可以單靠自然光照明，整體感覺好闊落環保同實用。
包頂仲吊住一個電燈膽，相信係夜晚用嚟照明。咁啲電喺邊度嚟？ 原來係用太陽能！蒙古包嘅外面通非都會有一塊太陽能電磁板為包內供電。蒙古包嘅木柱，床單枱布，圍住蒙古包內部嘅布全部都有花紋，顏色好鮮豔，同外面邊見到嘅感覺對比好大。佢哋平時煮食都會喺室內，不過包主同妹妹每日都係喺其他嘅蒙古包煮好食物再送過嚟，冇試過喺我哋個包入面煮食。
用個心去做嘅自家製蒸羊肉包
但係蒙古包入面無廁所，喺草地嘅另一邊有兩個木建築，一個係全天然嘅厠所設備被圍欄圍住，另一個係有熱水裝置嘅淋浴空間。所以最好日光日白就做曬你要做嘅嘢啦，如果半夜三更又眼瞓又黑又凍又大風嘅情況要出去大草原都算幾大挑戰。雖然係夏天，喺草原嘅夜晚都會好大風好凍, 本身想夜晚出去睇星星不過最後都係放棄咗。
喺草地嘅另一邊有兩個木建築 一個係被圍欄圍住嘅天然厠所 另一個係有熱水裝置嘅淋浴空間
我哋除咗留喺包主嘅地方之外，我哋喺第二日同包主同佢妹妹租咗架車去咗幾個觀光點。第一站我哋去咗離大草原大概1個鐘頭車程嘅成吉思汗紀念館，呢度有世界最大嘅成吉思汗騎馬不銹鋼像，你仲可以行上去成吉思汗隻馬頭上面嘅觀光台睇番四周嘅風景。嗰日陽光唔錯，銀光閃閃40米高嘅不銹鋼像的確好有霸氣。我就保持呢份霸氣，喺香港出名大汗但好普通嘅我嚟到紀念館梗係要威返次做吓蒙古大汗！
行完呢個觀光點我哋順路去埋特勒吉國家公園 Terelj National Park，公園嘅入口附近有一片草地可以出租畀人露營或者住蒙古包。但係佢哋排列得好淨係，而且都係密麻麻嘅，非常人造一啲都唔大自然，都係包住嘅大草原真蒙古包感覺正好多。園內例牌有動物畀你騎，不過當然係要收錢啦，呢度有馬同駱駝。
公園有一嚿貌似烏龜嘅烏龜石成為地標，似就幾似，不過相比起香港其實有更加多嘅奇形怪石會睇到你目定口呆，呢個地標只係一一般般。 就喺我哋將要回程嘅時候，我哋遠眺有一座好特別嘅廟喺深山嘅山腰，好想過去睇下。但係包主話今日冇時間去嗰邊因為去到山腳仲要徒步行上山腰先去到座廟，最後我哋只好失望而回。
包主知道我哋未騎過馬，就提議返到大草原如果天氣好可以畀我哋試吓騎。咁又唔同講法，心情即刻好返好多。凡事係冇絕對嘅，返去又有乜好怕喎。不過返去嘅時候經過烏蘭巴托市區就開始塞大車，而且路上都係沙塵滾滾，感覺同今朝非繁忙時間出城市好唔同，我終於知道包主原來係怕塞車，除非唔係。
世界最大成吉思汗騎馬不銹鋼像
返到大草原其實時間唔早，大約係晚上七點半，不過勝在日照長仲係好光猛。包主突然牽著一匹馬走到我哋嘅蒙古包前面話可以而家畀我哋試下騎馬，我哋即刻攞起電話準備影相就飛撲出去。
我哋終於第一次騎馬
包主話呢一隻係老馬，脾氣比較細可以放心騎。蒙古國嘅馬身型比較細小，四肢較短小，但係體質結實，係成吉思汗遠征到歐洲嘅持久良驅。佢話我哋首先要企喺要騎嘅馬旁邊，同佢傾吓偈同埋摸下佢先，等佢慢慢適應咗你而冇反感就可以試吓騎上去 。不過佢提醒我哋千祈唔好企喺隻馬嘅後面，因為大家都知道中國象棋馬後炮嘅利害，但其實現實中嘅馬後腳仲犀利仲危險。馬後腳嘅威力同馬力大到好似被車撞，所以一定要小心提防。
有包主從旁指導同牽頭馬我哋終於第一次騎馬，仲要喺大草原上面。唔知點解好開心，呢種開心係從心而發。包主又提醒就算騎著馬都要不時摸吓隻馬，我哋當然照做。佢嘅鬃毛手感好粗糙，但係身上嘅毛就出奇咁順滑而且充滿肌肉感同力量。不過我哋冇乜交流，佢好似好肚餓噤，全程有9成嘅時間都係低住頭係咁食草。希望遲啲有機會騎到一隻有交流嘅馬之後仲可以喺草原上奔馳。
我哋終於第一次騎馬
同包主閒談間發現原來佢後生嘅時候去過俄羅斯讀書，當佢知道我哋下一站會去俄羅斯都好興奮。我哋梗係捉緊機會叫佢教啲簡單嘅俄羅斯生字旁吓身，做左筆記仲錄埋音。不過就無錄影如果唔係可以做埋俄語一分鐘。
文字同語言都係我哋互相交流嘅話題，佢哋有一本好似記念冊嘅簿，叫啲喺度住過嘅遊客留言畀佢哋。當然我哋都唔例外，喺臨走前嘅一晚我哋好用心寫低咗我哋想同佢講嘅說話同分亨。我哋仲幫佢翻譯，同佢講返之前一啲用中文留言嘅人嘅內容畀佢聽。雖然係好簡單嘅交談但係我覺得好真實同好有意義。
喺呢一個寒冷嘅夜晚包主仲借咗佢嗰件蒙古國傳統大褸畀我當被襟，件褸好靚上面有好多刺繡，好似一件厚身用羊毛做嘅棉襖，係蒙古人冬天騎馬嘅時候著，於是我就誠懇噤收下呢份暖意。相信我哋今次都成功為香港留下咗一個唔錯嘅印象畀佢，同時間蒙古國同埋佢哋嘅遊牧生活都畀咗我哋一個好好嘅印象 ，絕對係一個要再嚟探索嘅好地方。
同佢講返之前一啲用中文留言嘅人嘅內容畀佢聽