大草原上嘅遊牧民族－烏蘭巴托近郊（上）
真蒙牛 - 氂牛 Yak
要認識一個遊牧民族，就梗係要去屬於佢哋嘅大草原睇下啦！喺烏蘭巴托附近大約 30 分鐘車程就可以去到近郊。當你越嚟城市區越遠，你就會睇到越真實嘅蒙古國。
我哋穿過一個山頭，行過一個鄉村就嚟到烏蘭巴托近郊嘅大草原。大草原雖然冇我想像中咁翠綠，不過的確係好大好大。我哋嘅四驅車見石過石，見河過河，見牛過牛。聽嘅唔係電台收音機，聽住架車行過石頭同水嘅聲，感覺好新鮮。不過發覺有啲垃圾喺河邊同草地上面就有啲失色。
我哋喺大草地上同啲動物係好近距離，當我哋架車行得好近佢哋以為會嚇親佢哋，但係佢哋都懶得理我哋，繼續好自由自在食草嘅食草，曬太陽嘅曬太陽，總算冇打擾到佢哋。回望烏蘭巴托嘅半山，單層嘅木屋同蒙古包變得越嚟越細，好快我哋就到咗目的地。我哋停咗喺一條河邊，有三個蒙古包，有一啲木嘅圍欄同埋小木屋。跳落車踏喺軟綿綿嘅草地上感覺好好。
有啲垃圾喺河邊同草地上面就有啲失色
我哋嘅蒙古包包主係一位叫 Oyunaa 包女士，佢喺首都烏蘭巴托嘅學校入面教英文，放暑假嘅時候會返自己嘅草原過夏天，係一個半城市人。我哋會用英文溝通，完全冇問題。佢嘅妹妹喺蒙古大草原過著遊牧民族嘅生活，每天都會放牛上山食草做運動，揸牛奶，打理蒙古包嘅日常大小事務。而我哋住嘅蒙古包原來就係妹妹平時瞓嘅地方。
佢哋有一個大牛棚，兩隻馬，三個蒙古包，同數唔盡咁多隻氂牛 yak。傳統蒙古人嘅財產唔係計銀行入面有幾多錢，而係計你有幾多牲畜。當中以馬匹最貴，大約等於我哋一架跑車嘅價錢。
喺我哋嘅遠方見到有兩隻馬，佢哋行嘅時候好奇怪，好似隻腳有事噤行路時窒下窒下。睇真啲原來佢哋嘅前腳綁住咗後腳，行喺路上嚟仲慢過啲羊仔。包主話冇幾耐之前佢哋有一隻馬畀人偷咗，損失好大，所以之後佢哋就用繩將馬嘅前後腳綁起，等佢行得冇咁遠又行得冇咁快咁就冇咁易俾人偷。
可憐嘅馬仔每日喺大草原上過著 56Kbps 嘅生活，連行步路都只可以窒下窒下，望見佢哋真係有啲唔開心。之後我隨口咁問佢喺大草原我哋嘅活動範圍大概去到邊度呢? 點知佢好霸氣咁同我哋講: 你眼見到嘅地方都係我嘅。
前後腳被綁住嘅馬
原來佢除咗係包主之外仲係一個大地主! 好奇嘅我即刻繼續問佢: 咁噠地係咪你屋企人一代傳一代咁留畀你? 佢就話原來喺十幾年前用咗一個平過香港買樓首期嘅價錢買咗呢笪地，因為蒙古國之前冇乜錢，最多嘅就係地，所以就要錢唔要地，仲有得你隨便揀個好地方添。
精明嘅地主就揀咗呢噠喺河邊同山邊嘅靚地，方便遊牧同居住。但係近呢幾年開始蒙古國有所變化，連佢哋嘅地價都開始緊張同瘋狂升值，佢塊地而家好似升咗好幾倍真係要買都買唔返了。即時打消咗我投資移民嚟蒙古國做氂牛奶爸嘅幻想。
你眼見到嘅地方都係我嘅
今次我哋嚟蒙古國原來撞正佢哋7月嘅選舉，所以我哋喺城市入面見到好多個廣告都有唔同嘅蒙古人向住我露出親切嘅笑容，估唔到去到大草原都見到佢哋。其中一個候選人係蒙古嘅歌星，佢班齊馬同佢嘅助選團著住蒙古國嘅傳統服飾，騎住馬揸住旗幟好似拍戲咁喺大草原上拉票宣傳。
喺佢哋嘅旁邊有一群路過嘅羊群，有大有細，羊仔行得比較慢就跟喺羊群嘅後方。不過唔使驚走失，前方有幾隻有幾隻牧羊狗帶領，後方就有牧羊少年包底放牧。喺香港食就食得多牧羊少年，嚟到蒙古大草原就見到真正嘅牧羊少年。
遊牧嘅蒙古人好環保嘅智慧同識得運用大自然嘅力量，喺河流嘅上游攞乾淨嘅食水，喺河流嘅下游洗衫洗污糟嘢，洗完嘅衫就咁放喺草地上面比太陽曬，反轉牛糞，等佢徹底乾透後儲起作燃料用，會帶牲畜去唔同嘅地方放牧，確保唔同地方嘅草都有時間復原生長，實行持續發展嘅概念，比起好多所謂既已發展國家更有智慧，喺自己每日嘅生活實踐，唔係淨係識得講唔識得做，值得好好學習。
騎住馬揸住旗幟好似拍戲咁喺大草原上拉票宣傳
實行持續發展嘅概念
比起好多所謂既已發展國家更有智慧