內蒙古 (中國) 嘅外圍係外蒙古 (蒙古國) 嘅內圍
中國同蒙古國過關嘅邊境
關口有傳統蒙古文，新蒙古文及中國簡體字
蒙古國 Mongolia 係我哋今次旅行嘅第一站，最直接了當嘅方法梗係坐飛機啦（大約4個鐘）。但因為我地唔趕時間，想慳錢，又想有較多經歷，我哋最後選擇用最貼地嘅方法就係用陸路進發：首先喺紅磡坐京港鐵路上北京，然後坐過境巴士由北京去內蒙古嘅二連浩特，之後過境去蒙古國邊境嘅扎門烏德，最後轉火車去首都烏蘭巴托（車程約共3日半）。聽落都知有幾唔同，而我哋嘅選擇都無令我哋失望，從那日下午我哋嘅坐上了那一架由北京開往扎門烏德嘅黑巴開始，驚喜就一浪接一浪噤未停過，好在每次遇到壞人壞事都有好人出現續一化解。
這架黑巴由不法分子經營，從事違法犯罪活動，喺過境嘅時候被公安捉到正，結果巴士遲遲都未能通關，我哋都因為咁錯過咗入黑前喺蒙古國邊境開去首都嘅火車! 好彩我哋遇到蒙古國好心嘅中國留學生，最後我哋用咗連旅遊書同網誌都無提過嘅特別方法安全到達目的地。想知究竟發生左咩事？宜家唸返起條氣都頂住頂住，都係等我心情平伏返少少再話你知。
那日下午，我哋坐上了北京開往扎門烏德的黑巴
未去過蒙古國（外蒙古）都唔係好識分外蒙內蒙，其實內蒙古係中國嘅一個自治區，喺佢嘅西北方外圍夾喺俄羅斯同中國嘅就係蒙古國。蒙古國有自己嘅貨幣 MongoliaTugrik—MNT，滙率大約100HKD：26000MNT，消費指數唔高。
蒙古國有自己嘅語言同文字，有小數嘅蒙古國人可以講英文，傳統嘅蒙古文形態好靚，不過完全體唔明。佢哋好受俄羅斯影響，好多時都會有蒙古文同俄文一齊出現。蒙古國人心地好好，至少我哋碰到嘅大部份都係，有時好人到你想像唔到。
千多米高原上嘅烏蘭巴托近郊
我之前所認識嘅蒙古國有西征到歐洲連外國人都識嘅成吉思汗、藍天白雲大草原、蒙古包、羊肉、馬奶酒、新鮮牛奶、蒙牛（原來係屬於中國嘅内蒙古）等等。
蒙古國嘅大自然郊區比起首都嘅市區有趣吸引好多，喺大自然你可以感受到遊牧民族嘅樸素簡單，順應自然嘅環保生活模式，動物同樹木嘅數目都多過人好多，廣闊嘅視野，清甜嘅空氣（鼻敏感都好返），晚上嘅寧靜等等。
從來無諗過我哋可以喺 Airbnb 租到大草原上嘅蒙古包，感覺好超現實。好客嘅包主每日會為你準備三餐或更多嘅蒙古傳統食物，非常推介。之前都唔知道自己咁鍾意蒙古國，下次返嚟想去戈壁沙漠，唔駛再留時間係城市。
Airbnb 租到大草原上嘅蒙古包
我哋嚟到蒙古國，住得蒙古包就梗係想感受多啲本地嘅文化，作為香港「代表」嘅我哋梗係要發揮好客之道精神。話說我哋一入到蒙古包，好客嘅包主就話要為我哋準備食物，我見到包內有個爐頭，喺腦海不斷浮現劉華茶類飲品廣告入面斬柴交友嘅畫面，我就即刻自薦幫手斬柴。點知俾包主一口拒絕，原來佢哋好環保，大部分嘅燃料會用天然生曬嘅牛糞。
被拒絕嘅我即刻提議去攞水，話晒條河就喺包嘅旁邊，就算啲水好凍都難我唔到嘅。今次包主一口應承，之後仲去攞個大桶畀我。我立刻除低對鞋，反起褲腳，行埋落河準備。雖然我淨係雙腳插水，但上身都感受到一股寒氣。轉個頭包主就返嚟，指住對面座山，話要去座山嘅後面攞水。純粹目測行過去起碼要30分鐘，我心諗佢係咪講笑，問多兩句就發覺佢係認真嘅。
之後佢話可以騎馬過去，我嘅表情開始變得有啲奇怪，喺香港識得騎單車都算唔錯，識得騎馬真係冇邊幾個。 我之後同佢講我唔識騎馬， 佢嘅表情開始變得有啲奇怪，我估佢純粹目測我起碼都有20歲，佢心諗我係咪講笑，我講多兩句佢就發覺我係認真嘅。佢初初唔敢相信， 因為喺蒙古嘅小朋友無論係男仔定係女仔，學識行同走之後就係學騎馬射箭。 最後我只可以將撲水嘅重任交返畀佢。
呢個文化差異的確好大：我諗返自己細個騎緊膊馬嘅時候，喺蒙古嘅小朋友已經識得騎馬；香港人諗緊點樣射波，蒙古人諗緊點樣射箭。之後我就有啲失落，低著頭咁行返入蒙古包。感覺好似被當頭棒喝一樣，受到好大嘅打擊，但係我個額頭點解會咁痛？！頂！原來我個頭真係狠狠咁撞到蒙古包個木門框，真係一日之內經歷咗幾次嘅意料之外。