蒙古國前傳 - 無端端做咗通宵泥鯭友睇日落日出
呢度係一個小社區：日落時分有小朋友喺球場打波；有大人拖住幼童傾計散步，感覺到一份好本土日常嘅溫暖
Mandukhai 落車之後，女司機就繼續釣泥鯭客。等咗冇幾耐，就有多兩個蒙古國女士上釣，我哋 5 個人嘅行李將整架車完全填滿。雖然女司機嘅身形同氣力都應該比我大，但我見得佢一個人搬貨，我都有落車幫佢手，最後要合力先閂到車尾度門。
泥鯭 van 內部加多度門同鎖，唔使怕行李會天外飛仙
上好貨嘅泥鯭 van 喺日落前正式出發。開車嘅時候大約係夜晚 8 點，啱啱開始日落。
我諗大家都係互不相識，不過車上 4 位蒙古國女士嘅交談讓我感覺到非常融洽。因為我哋唔識講又唔識聽，只可以微笑同睇風景。
行咗冇幾耐，我哋停咗喺一條小路旁邊。之後佢哋全部都落晒車，我估應該係去廁所。過咗大約 15 分鐘，佢哋攞住一袋二袋慢慢行返上車，原來佢哋去咗買乾糧同水。
本來諗住有得坐火車，所以冇準備任何食水。其實我哋成日淨係朝早食過炒飯熱鹹奶茶，同埋等過關嘅時候食咗生果同朱古力。完全冇諗過同準備連續兩晚坐通宵車，開始有啲擔心。
開車嘅時候大約係夜晚 8 點，啱啱開始日落
平時如果我肚餓，唔想又或者冇得食，最好嘅方法就係去瞓覺。但坐喺車廂後排其實有啲迫，我哋要好似打排球，用前後排戰術先可以勉強坐 4 個人，所以好難先瞓得著。
司機開車之後不斷講電話，去到一個球場旁邊就落咗車。睇真啲呢度應該係一個小社區：有小朋友喺球場打波；有大人拖住幼童傾計散步，感覺好本土日常。
司機行咗過去一位拖住幼童嘅年長男士旁邊，講咗幾句說話，攞咗個食物盒就行番上車。我估佢屋企就喺附近，趁住臨出差前見一見屋企人，攞埋個愛心飯盒先去返工。
正當我哋架車要離開，我回頭望見嗰位男士一直拖住幼童，目送我哋架車離開。成個畫面好溫暖，簡直係人情味滿瀉。
蒙古國小社區嘅本土日常
司機趁住臨出差前見一見屋企人，攞埋個愛心飯盒先去返工
坐坐吓其實唔記得肚餓，點知佢哋開始攞食物出嚟，就好似有一對樂隊喺我嘅肚入面熱烈演奏。我忍唔住用英文同身體語言問坐喺我旁邊嘅女士：我哋中途有冇機會買嘢食？
佢聽到之後瞪大雙眼，稍為停頓咗兩、三秒望住我，之後用蒙古文同司機及其他乘客講嘢。佢哋溝通咗一陣之後，呢位女士竟然用英文同我哋講大約 4 個鐘後可以停喺公路旁邊，到時會有嘢食。 我即刻瞪大眼睛，稍為停頓咗兩、三秒望住佢，非常驚喜發現原來佢識得講英文。
之前搵關於蒙古國嘅資料，喺首都以外識得講英文嘅少之又少，普遍都係年青新一代。之前遇到蒙古國嘅中國留學生 Mandukhai 已經好好彩，估唔到本身同我哋一齊坐黑巴嘅中年女士都識得講英文。
原來佢叫 Tsoogii，本身已經買咗火車飛，不過因為黑巴所以趕唔切搭火車。佢喺首都嘅大街有一間書店，賣二手英文書。每季都會去北京為書店添置新書，不過遇到黑巴佢都係第一次。
Tsoogii 發現我哋冇嘢飲無嘢食，主動分咗自己嘅水同麵包比我哋。雖然係一支簡單嘅支裝水，同埋喺超市買到嘅袋裝麵包，加上佢嘅熱情同關懷，成為咗我心入面好難忘同別具份量嘅一餐。
我連忙雙手收起呢份心意，配合坐喺度嘅 90 度鞠躬說聲多謝。泥鯭 van 上咗高速公路，咬一口麵包，飲一啖水，送一個橙黃色嘅鹹蛋黃都算係一番特別風味。
咬一口麵包，飲一淡水，送一個橙黃色嘅鹹蛋黃
Tsoogii 一路幫我哋翻譯，原來司機同埋其餘兩位同車嘅女士對我哋兩位都好好奇。冇幾耐佢哋講起自己另一半嘅時候，直情將氣氛推到最高點。
話說蒙古國男士返工之外，其他時間都留喺屋企做「妲己」，交由同樣要出外打工嘅太太事事都全面照顧。 太太要負責打理家頭細務、 撫育子女、一日三餐。
蒙古國太太其實就等於要服侍一個失去自理能力嘅人一樣，絕對唔使奢望男士會幫你分擔任何家務。唔怪得蒙古國嘅女性比較能幹，可以用刻苦耐勞去形容佢哋。 而喺屋企嘅男性就係「想節能、扮冇能」。
佢哋好奇問我哋香港嘅情況係點樣？我就答佢香港家庭大部分都唔係咁。早期香港普遍男主外、女主內。但近年都有女士負責返工搵錢、男士全職留在家中負責照顧屋企等家頭細務。如果兩個都要返工，家務就會分工去做，互相配合同尊重。關於男女嘅家庭觀念同家務分配，的確有好大嘅文化差異。
公路上嘅駱駝關卡
之後喺車入面嘅時間，我哋主要同 Tsoogii 傾偈。佢問我哋會喺蒙古國逗留幾耐仲有會做啲乜？其實我哋本身約咗 Airbnb 蒙古包包主聽日正午 12 點喺火車站等，之後接我哋去近郊嘅大草原。不過而家早咗到達，又未買蒙古國 SIM 卡，所以未聯絡到包主。
Tsoogii 一聽到之後非常緊張，話可以用佢嘅電話幫我哋聯絡。可惜我哋當時喺高速公路，電話完全接收唔到任何信號，要等到靠近城市嘅時候再試。
冇幾耐 van 仔減慢車速，轉咗嗰彎離開高速公路，去咗一條 「dun」 到甩肺嘅唔係路行。冇幾耐就停車，原來我哋到咗傳說中嘅路旁小店，可以落車食嘢去廁所。
一落車雙腳就踏喺沙石地上，晚間氣溫有一點涼。四周除咗食店、廁所同車輛嘅燈以外，抬頭只係望到一大片星空。廁所係全天然，係荒漠上嘅一個深坑。
公路旁嘅深夜食堂
全天然廁所，係荒漠上嘅一個深坑
我估深夜食堂應該係叫 「痺啤」BABY
食店室內好光猛，感覺簡單乾淨，食嘢前仲有濕毛巾比你抹手。食店非常本土，餐牌冇相睇淨係有蒙古國文，好在有 Tsoogii 幫手翻譯。我哋叫咗羊肉湯麵、 蔬菜羊肉湯同熱鹹奶茶。味道唔錯，食飽個身都暖曬。
食店室內光猛，感覺簡單乾淨
羊肉湯麵、熱鹹奶茶
蔬菜羊肉湯、熱鹹奶茶
睇見個餐牌一定知有乜食啦
同車嘅其中一位女士突然遞咗支藥膏比我哋，問我哋知唔知點樣用。佢係一支除疤膏，因為包裝只有中、 英文所以佢唔識睇。好在又有 Tsoogii 幫手翻譯，總算有一點交流。
大約停留咗一個鐘頭，我哋就離開食店，繼續通宵公路之旅。原來我哋行緊嘅公路上年夏季先剛剛開通，唔怪得條路咁新淨平坦，走起上嚟非常順暢。之後仲會連接中俄兩國公路，南至中國天津，北至俄羅斯貝加爾湖。
除疤藥膏交流
上返車冇幾耐竟然瞓著咗。睜開眼四周都仲係黑漆漆，隱約喺遠處見到連綿不斷嘅山。Tsoogii 好似冇瞓過覺，見我一起身就做導賞。佢話我哋已經入咗首都烏蘭巴托範圍，因為地勢特別易認，係四面環山嘅盆地。
天色慢慢轉光，前面係一大片藍橙嘅漸變色天空。雖然見唔到太陽由地平線升起，但親眼望到一片會轉色嘅烏蘭巴托天空，印象非常唔錯。
好似打緊機冇路燈嘅黑漆漆路段
連綿不斷嘅山山山 ......
晨早嘅藍橙漸變色天空
第二邊繼續都係山山山 ......
公路兩旁有草地，山坡上面見到有好多蒙古包。不過越靠近城市，越發現只有石屎地同十層樓高嘅平房。第一位泥鯭客就係城市附近落車。
之後我哋去上咗城市旁邊嘅一個山坡，沿著一條唔多係路嘅 沙石路一直上斜。用簡單嘅木板木條分隔開小木屋、蒙古包同塵土飛揚嘅沙石路，感覺較破舊落後。
越靠近城市，越發現只有石屎地同十層高嘅平房
接住落車嘅係坐喺車頭嘅泥鯭客，司機停車後立即幫手落貨。我喺車箱度等咗一陣，突然醒起佢有幾十箱貨，於是我都落車幫手一齊落貨。
幾十箱貨都係一樣大細，攞上手都幾重手，我估可能係瓷磚塊。雖然朝早氣溫有啲凍，幫手搬完貨都出咗一頭汗。
城市外圍嘅山坡又係另一個景象
而家時間尚早，只不過係晨早五點零鐘。Tsoogii 問我哋之後去邊度， 我哋話想試吓去啲平 motel 落腳、沖涼、小睡一下。Tsoogii 同司機商量咗一陣，就載咗我哋去有可能嘅地方試吓，不過最後都係唔成功。
Tsoogii 提議我哋可以去佢屋企坐，等晏少少再打電話聯絡包主。我哋欣然接受呢份溫暖嘅邀請，可以到訪本土蒙古國家庭，實在係求之不得。
無幾耐佢老公嘅私家車就嚟到，我哋用十萬蒙古幣現金繳付車資後，就將所有行李同貨物搬到私家車上。
印像中Tsoogii 住喺一棟八至十層樓高嘅平房，佢嘅老公唔似之前喺車討論嘅咁。至少佢會晨早親自揸車去接老婆，仲會主動幫手搬貨搬行李。
入屋後 Tsoogii 老公留喺客廳，我哋就留喺飯廳，Tsoogii 仲親自煮正宗蒙古國鹹奶茶招呼我哋。其實大家兩晚都冇覺好瞓，我估佢都好攰，但都係堅持熱情招待我哋，從心底裏再一次感受到蒙古國人嘅超級熱情好客。
非常講究嘅 Tsoogii 準備好鹹奶茶就用銀碗裝起，跟傳統首先服侍老公，之後先到客人及自己。忙完一大輪，確保我哋有嘢飲有嘢食，Tsoogii 先放心坐低休息一吓。
熱鹹奶茶嘅茶葉
要隔茶渣奶茶先夠滑身
正宗嘅熱鹹奶茶一定要用銀碗裝
不過佢坐低冇幾耐，又攞起電話，試幫我哋聯絡包主，試吓可唔可以提早過嚟接我哋。好順利聯絡到包主，佢哋互相交換咗電話號碼，話大約一個鐘頭後到達。
食過麵包搽果醬，Tsoogii 喺廚房攞咗幾嚿有半隻手掌咁大嘅鹽結晶比我哋睇。我都未見過成嚿石頭咁大嘅鹽，攞上手比想像中重，感覺真係好似攞住嚿石咁重。佢仲送咗一嚿鹽結晶比我哋做手信，話食物用佢嚟調味會特別好食。
有半隻手掌咁大嚿嘅鹽結晶
Tsoogii 怕我哋攰，帶咗我哋入佢囡囡間房，話如果有需要可以休息一吓。原來佢囡囡結咗婚搬咗出去住，仲有一個剛出世嘅孫仔。間房有一張成吉思汗畫像同一個馬頭琴，佢哋都係傳統蒙古國家庭必備嘅物品。
從窗口望出去，係一幢較矮嘅平房，不過就唔似住宅，原來係一間小學。Tsoogii 話平時會有好多學生走來走去，會比較嘈。咁啱而家放暑假，所以比較清靜。
我哋之後同新春拜年一樣，除咗要同人問好，就梗係要問 Wi-fi 密碼。Tsoogii 有幫佢嘅英文書店開 Facebook page，我哋確定佢書店嘅位置，約好三日後去探佢。
突然電話響起，原來包主已經嚟到。Tsoogii 同佢老公一齊送我哋落樓，要親手將我哋交比包主，同佢見一見面，確保我哋安全先放心。 臨上車前我哋衷心多謝佢嘅照顧，叫佢好好休息一吓，約定去佢嘅書店再見。
喺大街上嘅二手英文書店
幾天之後，我哋跟住地址，好順利就搵到書店。佢喺最旺嘅大街，係一間喺地庫嘅小店。店內有唔同類型嘅二手英文書，Tsoogii 啱啱為今次北京之旅嘅收穫開箱，為新書喺上架前做登記。
去到書店最吸引到我係咩書？識睇就梗係睇地圖啦！因為圖畫多個字麻！於是我揀咗一本仲厚過砧板嘅 World Atlas 睇，但發覺都係字多過圖，不過佢係小數我有興趣睇嘅書。相信之後我返到香港，都會買返本傍身。
我哋喺書店逗留咗大約一個鐘，我最後買咗一張烏蘭巴托嘅地圖做手信，Tsoogii 就送咗兩本學蒙古國文嘅生字書比我哋。臨走前我哋再多謝佢，拍個照留念就說再見，繼續喺磚頭上探索烏蘭巴托嘅市區。
回想起當時只係出發咗短短十日就遇上非比尋常嘅經歷，全因國產黑巴而起。首先係蒙古國駐南京大學生 Mandukhai ；之後有極本土釣通宵泥鯭 van 入城；最後遇上開英文書店嘅 Tsoogii 同一朝早去佢嘅屋企家訪等等。
過程全部精彩刺激，有機發生，等我可以感受到蒙古國人最真實嘅一面。 當中冇預先安排，又或者應該話，有些事情根本就冇得預先安排，呢個就係旅行最吸引人，最叫人難忘、最珍貴嘅地方。
喺南京讀大學嘅 Mandukhai
喺烏蘭巴托開二手英文書店嘅 Tsoogii
下回預告
<跨過中國同蒙古國之後，開始 14天嘅日俄夜俄之旅 ……>